भुइँमान्छेको सपनाः 'मुसा मानुष'

मुसा र मान्छेले सजाउने

सुठगित सपना

प्राय: सखाप हुन्छन् ।

— रोवर्ट बर्न्स

‘पैताला’ उपन्यास लेखेर नेपाली साहित्यमा आफ्नो छुट्टै छवि बनाइसकेका लेखक गनेस पौडेलको दोस्रो कृति हो— ‘मुसा मानुष’ । यो उनको पहिलो अनु-सिर्जना हो ।

स्टेनबेकको 'अफ् माइस एन्ड मेन' संसारभर सर्वाधिक रुचाइएका सदाकालीन आख्यानमध्ये एक हो । सन् १९३० को महामन्दीपछि व्याप्त नैराश्यका बीचमा टुसाएको अनागरिकतुल्य अमेरिकी भुइँमान्छेका साझा सपनाका आँकुरा र त्यसलाई फुलाउने सिसिफस-यत्नको तिब्रताले जो-कोही पाठकको हृदयलाई हुँडलेर लान्छ |

कथाको दुख्याहा पात्र लेनी वयले वयष्क छ तर बुद्धिले बालक । रेशमी कोमलताप्रति कायल त्यो अजङ्गको लाठेलाई आफ्नै हत्केलामा लुकेको तागत र त्यसले अरूलाई पार्न सक्ने क्षतिको रत्तिभर आभास हुँदैन । त्यस्तो लठेब्रो साँढेप्रति सानो कदकाँठीको तर चतुर बुद्धिको जर्ज मिल्टनले देखाउने निःशर्त प्रेम र अभिभावकत्त्वको फेहरिस्तले यो कथालाई युगीन बनाएको छ ।

जोन स्टेनबेकको, यो सुन्दर उपन्यासिका तारिफयोग्य छ । किताबले एक समयको अमेरिका बोलेको छ । देखाएको छ । यसमा प्रयोग भएका भाषा र संवादहरूले, अमेरिका कुनै देश नभई— नेपालकै कुनै पश्चिमी जिल्ला/प्रदेश हो झैं लाग्छ । पात्रहरूको आँखाबाट नभई, किताब कथाको डिटेलिङ~नजरबाट देखाइएकोले— किताब पढ्दै गर्दा कुनै सिनेमा हेरेझैं लाग्छ ।

लेखक तथा अनुवादक गनेस पौडेलले, एक नोबेल पुरस्कार विजेता लेखकको सुप्रसिद्ध किताबको स्वाद नेपाली पाठकलाई आफ्नै भाषा/बोलीबान्कीमा चखाएका छन् ।

***

‘बुकहिल’ पब्लिकेसनबाट प्रकाशित भएको यो किताबको मुल्य रु.३५० रहेको छ ।

 यो किताब अर्डर गर्नको लागिः http://kitabkiro.com/books/