रिचर्ड ब्रटिगनका ३ कविता

प्रेम कविता

यो कति अद्भुत महसुस छ

बिहान तिमी उठ्छौ

एक्लै तिम्रो एक्लो बिस्तारामा

र तिमीले कसैलाई भन्नु पर्दैन

कि तिमी उसलाई प्रेम गर्छौं

जबकि तिमी अब उसलाई प्रेम गर्दैनौ ।

***

बू, सधैंभरि

मभित्रका

हरेक खाली ठाउँहरूमा

एउटा महसुस भुत बनेर दौडिरहेको छ

तर्साइरहेछ मलाई

कि म तिमी बिना बाँच्न सक्नेछु ।

***

३० सेन्ट्स, दुइटा टिकट, प्रेम

तिमीलाई सम्झिदै

म बसमा चढेँ

३० सेन्ट्स भाडा तिरेँ

र खलासीसँग दुइटा टिकट मागेँ

तब मलाई थाहा भयो

म त एक्लै गाडीमा चढेको थिएँ ।

***

रिचर्ड ब्रटिगन~ अमेरिकी कवि, उपन्यासकार र कथाकार हुन् । उनी आफ्ना उपन्यास र कविताका लागि बढी प्रख्यात छन् । उनका लेखहरू प्रायः सरियल हुन्छन्, साथै उनका लेखहरूमा 'डार्क ह्युमर' र 'सोसियल क्रिटिसिजम' पनि भेटिन्छन् ।